*قصة أمل..!*

قصة أمل..!

قصة البطل الفدائي/مختار حسين الفار

قصة واقعية قرأتها فاهتز لها وجداني..

ونبض بها قلبي..وتحرك بها قلمي..

فنسجتها زجلا ً..

………………………………………..

مختار حسين الفار..

قام وانتفض وثار..

أما شاف أبوه قدامه إنكسر..

وقلب أمه اللي إنفطر..

أما جُم قالوا الخبر..

ابنك فقيد..

والحقيقة إنه شهيد..

الأب عارف الحقيقة..

والأم بتعد الثانية والدقيقة..

بتستنا يرجع ابنها..

نور عيونها وقلبها..

وآهي قاعدة جواها الأمل..

فاتت سنين من غير ملل..

والجرح لسه ما اندمل..

أخوه "ممدوح"كان بدر إكتمل..

يوم ما فدى وطنه ودينه..

ووهب لهم عمره وسنينه..

"مختار" كمل الطريق..

لا ف يوم مل ولا حس بضيق..

جرح قلبه لسه بينزف..

روحه وجوارحه جواه بتهتف..

لاجل ما ينتقم..

وجراح قلبه تلتئم..

دم أخوه مش هدر..

وابتسم له القدر..

ساعة ما دخل الحربية..

واختاروه للمدفعية..

واما شافوا منه القوة والشجاعة والبسالة..

رشحوه يدّرس صاعقة ف المدرسة للرجالة..

وده كان بالنسبة له حلم إنه يحققه استحالة..

وزغرد قلبه م الفرح..

آهو زرع وزرعه طرح..

دلوقت هيبقى ورا خطوط العدو ووسطهم..

وراح بباسلته وقوته يهزهم..

وآه يا زمن..

قالوا هتروحوا تحاربوا ف اليمن..

وده كان بالنسبة له أكبر المحن..

طب ليه مايحاربش اليهود..؟!

هو ده عدوه الخاين اللدود..

هو ده اللي هياخد منه تاره..

هوده اللي هيمسح عنه عاره..

ودعا من قلبه بحرقة وإيمان..

ودخل "رينجر" الأمريكان..

وبكده بقى عنده خبرة..

واتعلم م الدنيا عبرة..

واختاروه عشان مهمة..

ودخلها وبكل همة..

رغم اللي قالهولوه "عطية"..

ده اليهود قوة وعفية..

وأمك هتسبها لمين؟!..

ومراتك و"أشرف" و"شيرين"..؟!

لكنه دخل القنطرة..

فدا بلده مش منظرة..

ووقف جنبه ربه ف غربته..

رغم اللي كان نجح وخرج من أزمته..

ورجع وصاحبه لبلدهم سالمين..

واستقبلتهم بفل وياسمين..

لكن القادة الكبار..

استخفوا..يطلع إيه النقيب "مختار”..؟!

يفهم إيه ده ف السياسة..؟

إحنا القادة..إحنا الساسة..

وإنطفا بريق عيونه..

مات الأمل جوه جفونه..

راح جهده ورا السحاب..

لمين يكون اللوم والعتاب..؟!

وقالوا تاني مهمة تانية..

ودخل وما فكر ثانية..

رغم الصعوبة..

رغم العطوبة..

رغم الألم..

الرجالة من"الرديف"..

والسلاح قديم خفيف..

وبإيه ينفع الندم..؟!

قالوا الحرب..

فرح الشعب..

آهو زال الكرب..

ما عرفوا إنه ابتدا..

بكى فوق ورق الشجر الندى..

نكسة سبعة وستين..

والشعب قال على فين رايحين..؟!

يا جند مصر ليه ساكتين..؟!

وخاف "جمال" الشعب يثور..

من نار الهزيمة يهيج ويفور..

وشعب مصر أبي و جسور..

قام دخّل آلاف السجون..

حتى اللي حب مصر بجنون..

وكان منهم "مختار" وغيره..

من زهور شبابنا وخيره..

أربع سنين ونص عذاب..

ذل وإهانة من غير أسباب..

وطلبت مراته الطلاق..

بعد ما يئست م الفراق..

واتحرم من ضناه..

باقي إيه للحياة..؟!

صبر ومسك ف كتاب الله والآيات..

سنة ورا سنة وقصص وحكايات..

ومات "جمال"..وجه "السادات"..

وأخيرا ً جه الفرج..

و ف الآخر "مختار" خرج..

وشاف الدنيا بعيون جديدة..

السجن خلاه شخصية فريدة..

ورجع لأهله وناسه..

وانفجر بركان إحساسه..

وما صدقت أم الشهيد..

وملت الدنيا فرح وزغاريد..

وقعد أسبوع ليل نهار..

البيت بيشغي مليان زوار..

ع العشا..وع الغدا..وع الفطار..

ده بيسأل ع الصحة وده ع الأخبار..

واللي حصل واللي كان..

واللي جرى وأخبار زمان..

و ف يوم وبعد نص الليل..

جاله "عفت" بعد صبر طويل..

قالوا "السادات" عايزك تروحله..

وكان خبر اتهزله وفرحله..

ويومها "مختار" ما جاله نوم..

وفات اليوم ورا اليوم..

وجاله "عفت" وقاله قوم..

وخده على إستراحة القناطر الخيرية..

إستراحة"الفاروق"البهية..

اللي بعد الثورة راحت "للسادات"..

عهد الملوك خلاص إنتهى وفات..

وقعد الريس مع "مختار"..

وقاله ده الزمن دوّار..

اللي حكم..

واللي ظلم..

بنوا السجون..

حطوا النظام..

حطوا القانون..

ودارت دواير الدنيا..

وعدت السنين ف ثانية..

و ف نفس السجن دخلوا..

وخرج اللي إنظلم..

يا ابني انسى الألم..

قاله "السادات" ارجع للعسكرية..

وقال "مختار" أنا عشت مُعاناة قوية..

اللي إتهانت كرامته وشرفه..

ما يقدر يدافع عن شرف بلده وعرضها..

ازاي يدافع عنها وعن أهلها..؟!

ازاي يحضن تراب أرضها..

بعد الهوان منها..؟!

نادى "السادات " هاتوا خريطة..

لأرض سينا الطاهرة المجيدة..

وقعد مع "مختار" ساعات..

وبدأ "مختار" أول خطوات..

الحرب قايمة..والحلم جاي..

وخلاص نسي اللي فات..

سينا يا أغلى ما في الوجود..

أنا حبي ليك مالوش حدود..

عشان عيونك بروحي أزود..

وحارب "مختار"..

73حرب إنتصار..

(الله أكبر) هزّه الكون..

والدموع مليا العيون..

الحلم اللي كان بين الجفون..

مش عايزين أغصان زتون..

الحرب كان لازم تقوم..

خلاص يا مصر معدش نوم..

الجند اللي كانوا صايمين..

دخلوا المعمعة مستنين..

عايزين يفطروا هناك..

عندك يا رب..

عند الرحيم..

الحرب خلصت وانتصرنا..

ليكي يا سينا خلاص رجعنا..

"مختار" ياللي ياما قسيت..

الفرحة بتقولك أنا جيت..

حققت حلمك وانتقمت..

ابنك رجعلك وانتصرت..

"مختار" يا رمز للفدا..

"مختار" يا نبع للعطا..

تحية ليك ولكل أبطال حربنا..

تحية ليكي يا أمنا..

يا مصر يا أغلى ما عندنا

ساره نهل المصري

( همس القمر )

السبت: 1\1\2005

الساعة 14:10